الوطن العدنية/مقال لـ"بهاء حجازي"
ليلى عبد اللطيف اللي بقت ترند من ساعة ما طلعت في راس السنة وقالت ان احمد العوضي وياسمين هيتطلقوا.. بقت فقرة ثابتة في برامج كتير الفترة اللي فاتت.. ومش عايز افتي في موضوع ياسمين وعوضي.. لاني معنديش معلومة مؤكدة.. لكن مصدر اثق فيه جدا.. قالي ان الطلاق حصل قبل ما يعلنوا عنه بكتير.. ودلل ان ياسمين محضرتش عرض فيلم الاسكندراني.. (بس مش موضوعنا.. ربنا يسعد الناس كلها)..
ليلى من شوية كانت مع عمرو أديب اللي قالك بسنت بتاعت التارو دي فستك.. احنا نجيب ليلى في فقرة نسألها عن كل شيء في كل شيي.. فقالت ايه بقى..
- انا بتوقع والتوقع الكويس بقول يا رب يصير والتوقع الوحش بقول يا رب يصير.. وتوقعت طلاق ياسمين لاني بتابع أعمالها وبحبها قوي.. فمش عارف ايه الرابط.. انت بتحب فنان فايه الرابط انك تتوقع طلاقه..
- وراحت رازعة ياسمين توقع تاني.. انها مش هتكمل حياتها لوحدها وهتتجوز تاني.. وبتوشف ان ربنا هيرزقها بطفل.. بغض النظر ان ياسمين مخلفة ومعاها بنت اسمها ياسمين كمان.. بس دي متمشيش امنية علشان انتي بتحبيها.. لا دا توقع.. (وبعدين لما عمرو استغرب وقالها طفل.. قالتله هيبقى قاعد معاها طفل ازاي مش عارفة)
- الهامي بيقول إن الاطباء هيبعدوا بايدن عن الرئاسة.. ومفيش سيدة اولى تاني في امريكا.. لان السيدة هي الرئيس.. (ايوة يعني ايه).. بايدن هيكسب ولا ترامب.. هو مفيش سيدة الدورة دي.. السؤال بيقول مين هيكسب فلان ولا ترتان.. تقوليله مفيش سيدة اولى تاني.. دي شبه اجابتي في مادة الجغرافيا المستوى رفيع لما كنت مبعرفش السؤال كنت بلف وادور واقول واعيد وازيد وفي الاخر قفلت المادة.. (وفي الاخر قالت الهامي ان مش بايدن ولا ترامب)
- وراحت ناتعة نتعة حلوة عن الجنيه المصري سنة 2024.. وقالت ان الجنيه هيتعثر بسبب التطورات في المنطقة.. لكنه هيعود ويرتفع بشكل غير مسبوق.. واكتر من دولة عربية من دول الخليج هتحمي الجنيه المصري في سنة 2024.. والبيوت والاراضي هتغلي قوي عندكم.. ومصر والجيش المصري هيبقى قوي جدا.. (دا كلام بيقوله احمد موسى كل يوم عادي).
- احد الفنانين بيكون امام خطر كبير ومفاجئ وقد لا ينجو منه واراه سيفارق الحياة في 2024.. فعمرو قالها (الفنان دا مصري).. قالتله لا مش هقول.. قالها خطر كبير يعني مرض.. قالتله طريقة غامضة حد بيعمله شيء.. وممكن يكون امرأة او رجل.. انا عايزك تقولي سنة واحدة مماتش فيها فنان.. سنة واحدة بس..
- منتخب مصر بقى هيفرح الشارع المصري.. وشايفة الشارع المصري هيفرح بمنتخب مصر من ورا انجاز كبير.. (انا يا عمرو لما بحط حاجة في راسي بتصير.. طيب انتي ست بركة مش متنبئة ولا حاجة).
- ماكرون هيزور دولة عربية.. وسيقوم باستقباله رئيس الدولة والمفاجأة انه رئيس الدولة مش هيبقى رئيس بعد كدا وهيستقبله رئيس تاني... (بسم الله الرحمن الرحيم.. بهاء حجازي الاجابة السعودية)..
- في 2024 او 2025... تركيا هتبقى في تغيير مصيري.. وقلقانة صحيا على اردوغان وبقوله انتبه على صحتك.
- شيرين هتستقر عاطفيا وهترجع شيرين وهتبقى اقوى.. ومفيش وجود لحسام حبيب في حياة شيرين حتى لو رجع دلوقتي.. بكتيني يا شيخة.. يعني هيرجعوا ولا لا.
- السلطة الفلسطينية هتتكاتف وهتتوحد وبتتجه كل الانظار على السنوار بسبب حدث مهم.. ايه هو الحدث الله بيعلم (يعني فتح وحماس هيتوحدوا).. طيب دا لو حصل انا هديكي شقتي اللي في الـ 800 فدان..
- رئيس اوكرانيا مش هيبقى رئيس اوكرانيا.. الحلف العربي الروسي هينتصر على اوكرانيا.. (مال ام العرب بالموضوع)..
- مصر هتحل مشكلتها بالمفاوضات مع اثيوبيا (اصلا مصر اعلنت انتهاء المفاوضات مع اثيوبيا).
- ابويا اسمه محمد عبد النبي عبد اللطيف من الزقازيق وامي لبنانية.. وابويا خلف من امي 3 بنات ومات.. وهعمل كتاب عن قصة حياتي.. لان عندي توقعات خطيرة في العالم.. بس مش هقدر اعمل الكتاب غير بعد ما اموت.. لانه بيحمل توقعات خطيرة..
وخد التوقعات السريعة
- رئيس دولة عربية هيبقى لاجئ سياسي في دولة اجنبية (يا رب اللي في بالي يا رب).
- العائلة الملكية في بريطانيا يلفها الحزن بسبب حادث حزين هيؤدي لرحيل أحد افراد العائلة.
- الحرب الامريكية اليمنية هتبدأ قريب.
- مقتدى الصدر في دائرة الخطر وعايزاه ياخد باله من نفسه.
- انقلاب دموي في العراق هيقلب الدنيا... وبعدين انتخاب رئيس جديد وحكومة عراقية جديدة.
بص . كل دا اسمه توقع .. توقع يجمل الصح والخطأ.. يعني زي ما تتوقع الاهلي يكسب.. فوارد يكسب ووارد يخسر.. انت تاخد دا على انها عراف نوسترداموس وتمشي وراها تقولها قوليلي مراتي هتخلف ولا لا.. وجوزي شنبه هيطلع ولا لا دا هطل... هطل .. هطل.. وانا بقولك نصين الكلام دا يخضع لمبدأ القراءة السياسية.. شوية نميمة.. شوية فكاكة.. شوية كلام حلو.. جنيه ايه اللي هيتعافي في 2024.. دا احنا لو قفلنا 2024 زي 2023 اللي هي اتضحضحنا فيها ليكي الحلاوة يا ولية يا بركة.. الغريب ان عمرو اديب فرح قوي وقالها ليكي الحلاوة وشكرا.. والفقرة التانية جاب حسن الصادي أستاذ اقتصاديات التمويل وقاله احنا رايحين في داهية والدنيا بايظة ع الاخر.. فانت حر اسمع كلام العلم ولا تسمع كلام الست ليلى.
كذب المنجمين ولو صدفوا .. ايوة صدفوا بالفاء يعني جات معاهم صدفة.. او حتى صدقوا.. شوف حتى لو صدقوا برضه كدابيم .. .. بيفكروني .. بالناس اللي يقولك انا بطلع فلوس من تحت الارض وعايز اطلعلك فلوس بس تدفع كذا .. طيب بتعرف تطلع فلوس طلعها لنفسك يا اخويا... فانتي يا ست ليلى الله يمسيكي بالخير ... اتجوزتي مرتين.. وجوزك الاولاني مات.. كنتي توقعتي انه هيموت .. يحضرني مثل معبر هنا ما قاله الشاعر .. كان العاق نفع نفسه .. ومشيها العاق.
فيا جماعة نفوق الله يرضى عليكم.. ولا منفوقش خلينا كدا علطول نايمين واللي شبكنا عنه ما خلصنا.. وزي ما قالت الست الفاضلة لما سالوها عن الانتخابات: "لازم نتتخب وولا الانجليز يخشو يبعب*ونا..
